油浸尖筍，咬落微爽，不過味道偏甜，醬味勁厚，完全包到尖筍實一實。海蜇燻蹄，最初黎左碟燻蹄既皮好似被人用牙咬走晒咁，勁肉酸，即刻要求經理換過碟。好彩第二碟無問題，海蜇爽滑、燻蹄軟棉，沾上大量酸醋中規中句，如果加些麻油會香口一點。現成酸醋實在太普通，記得小學時期酒樓自家調製，酸酸甜甜，香氣濃郁，令人非常開胃，依家有此味道既食肆真係少之又少，隨緣吧。
椒絲腐乳通菜炒牛肉，通菜質量麻麻地，有點硬而且水份欠奉。個芡汁好杰又厚，漿到實一實，味道單調平淡，腐乳味道微弱。走油醃牛肉都好腍，略略乸過免免強強，最敝全無鑊氣。
響螺燉雞湯，隻雞完全煲到無晒味，又鞋又韌又起渣，沾點豉油還好，但食兩啖最終都要放棄。響螺肉好味，海味味鮮甜出眾，軟腍富彈性。好鍾意飲湯，尤其是燉湯 ﹗芬芳撲鼻，雞味清香無比，飲落雞味濃厚，加上響螺肉鮮味，堅好飲，連飲四五碗，清呀 ﹗
百寶冬瓜盅湯，得兩款燉湯揀乍，響螺燉雞湯已飲過，輪到試冬瓜盅啦 ﹗熱騰騰，每次都忘記冬瓜有幾熱，大啖咬落去又淥到口入面甩皮喇，陰功 ﹗大大舊原隻冬瓜加入蟹柳、蝦肉、瘦肉、青瓜、鮮百合、竹笙、冬菇、草菇、圓肉、脆肉瓜、火鴨絲、節瓜、等等，勁多料 ﹗
湯汁超級清甜，好好味 ﹗冬瓜燉得透徹，索盡所有精華，好食到不得了 ﹗味道濃郁又清甜，冬瓜既腍又索盡湯既精華，好食又好飲 ﹗整個冬瓜盅完完全全消滅，太鍾意飲湯喇 ﹗連渣都無得剩。
魚湯浸花膠娃娃菜，估唔到會係明火喎。個魚湯底淺如水，試兩啖放棄，怕會有副作用，頸渴就麻煩喇。廉價花膠桶，有點腥，只爽不膠口。娃娃菜完全唔似娃娃菜，不爽不嫩不多汁，菜葉又鞋又粗又韌 ﹗十足大陸旺菜，好難食 ﹗盡力試多幾塊，最後都係要放棄 ﹗
鮑魚雞煲，次次都啫啫雞煲真係好鬼悶，終於都搞搞新意思喇，我好鍾意食依個煲啊 ﹗醬油爆得雞件非常香口，肉嫩幼嫩剛剛熟，又有散發著濃郁鮑魚味道，份量十足大大煲。鮑魚又彈又香，好味道。
椒鹽蝦，侍應姐姐話請我地食，多謝呀，唔通認得我係我阿媽個仔？本應有贈卷先有得送架。唔夠新鮮既蝦最好就椒鹽架喇，蝦肉又至於話霉既，只係有少少腍囉，味道又咸左少少囉，蝦殼有點油又唔夠胞囉，唔可以連殼食呢。
芝士焗澳洲龍蝦烏冬，依個真係不得了呀 ﹗menu 寫住有斤半龍蝦收我四百蚊 ﹗入口便知龍定蟲，居然比隔夜雪藏龍蝦我食？有無搞錯呀 ﹗龍蝦肉用鹽乸到勁咸，質感有部份霉肉、有部份脆口 ﹗毫無鮮味，食落口已好明顯係食緊死蝦，一心黎係想食新鮮澳洲游水龍蝦 ﹗真係火都黎呀 ﹗芝士烏冬還可以，嚥嚥韌韌又滑溜，並不是街邊貨，但四百蚊食碟死蝦烏冬，氣難下。
籠仔水蟹糯米飯，低處未算低，從未食過咁難食架 ﹗見傳菜阿姐攞住籠飯去另外一檯食客，之後攞回廚房，再送飯比我地。懷疑籠飯係該食客退貨，再轉到我地手中囉 ﹗蒸飯連煙都沒有，只是微暖，蟹同飯都出晒水，放左好一段長時間。蟹肉完全無味道又乾爭爭，衰過雪藏。飯粒撈左豉油同蒜蓉勁咸，但半點蟹味都沒有，劣 ﹗
薑蔥生蠔，生蠔有用脆漿炸過再回鑊炒香打芡，見有食家推介咪專登試試囉 ﹗炸得鬆化不硬，但味道咸得要命，免強入到口，送白飯可能會好一點，芡汁杰撻撻，試一次便夠。
蒜蓉粉絲蒸聖子皇，又乾又鞋又韌，趙緊香口膠一樣，蒸到過晒火，本應蒸三分鐘就已經食得 ﹗救命呀，所有海鮮全軍覆沒 ﹗
上湯焗波士頓龍蝦手打烏冬，最正係個手打烏冬，嚥韌滑溜又米香出眾，掛上大量上湯湧入口，好好味，絕不是平價即食烏冬 ﹗而且索晒上湯同龍蝦既精華，真心好食 ﹗幾十蚊龍蝦都預左無咩肉食架喇，味道及質地合格。
清蒸沙巴龍躉 2 斤孖寶套餐，最初上條一斤都無既魚仔上檯，大過我手掌一丁點，係我想發爛之前，個部長叔叔突然醒目左，衝過黎自動收返條魚話上錯檯，算您快我一步啦 ﹗再等廿分鐘，大魚到喇 ﹗但睇黎都係無兩斤，唔係大陸計法十兩當一斤麻？算數，我趕時間 ﹗無侍應拆魚，要我自己做埋，都算數 ﹗蒸得幾鬼鞋架喎，都算數，是但食晒去唔好浪費。
脆皮乳豬半隻孖寶套餐，隻豬堅係好食好，齋係食瞓疴 ﹗肥騰騰，無肉食，層皮翻燒過火，雖然略脆，但入口即散。
竹笙海皇翅，我原本 order 蟹肉海皇翅架，無就無計啦 ﹗個個都唔飲，話之您，我自己飲，好味道啊 ﹗湯底濃濃雞湯味，大量竹笙跟翅針，滿足。終於散叫個湯係滿意架喇，怨氣度稍為回落一點。
燒鵝半隻，海港招牌菜，最穩陣 ﹗HKD158 都好合理。身材健碩，結實又大隻，遺憾地太過肥、太過油 ﹗香噴噴降落，立即放入口驗一驗先，不過先將肥膏咬走。皮香肉嫩，肉汁又豐富，雖然肥左少少，有好多肥膏呀 ﹗
肉質滑溜溜，幼嫩細緻，秘方香料跟鵝肉融合，散發出濃郁香甜可口味道。閃令令的肉汁從纖維中流出，滋潤鵝皮鵝肉，美味極致 ﹗如果皮薄點、鵝瘦一點、唔好咁油就更加開心喇 ﹗
食完個垃圾孖寶龍躉同乳豬谷鬼氣，我即刻要叫碟靚燒鵝舒緩一下激動情緒先得呀 ﹗阿媽仲話要叫例牌，差幾十蚊梗係叫半隻啦，咪鬼煩 ﹗食完阿媽仲係度怨搵笨、怨唔好食，一早講左咪黎海港，跟我去沙田 18 食片皮鴨 ﹗依家又浪費金錢，比多少少食好一點好過啦 ﹗
