一鍋瘋 (Closed)

上星期同朋友路經通菜街，順便揾下食。叫左十道鮮味鍋，湯底就要椰子湯，係無味精無色素，好健康啊。十道鮮味仲包田園沙律，為我個胃打一打底，沙律菜新鮮爽甜，不錯。十道鮮味盛惠158，有十款海鮮，算好抵下。海鮮有蝦、花甲、蜆、蟹、班片、貴妃蚌、鮑魚同蠔仔。最好食係花甲同蜆，好肥美鮮甜。蝦爽口、班片滑，其他都唔錯。配料方面，我地叫左肥牛、蘿蔔、水餃、豆腐、蟹棒。個湯煮完海鮮先落其他野食，倍加鮮甜，蘿蔔嗦汁就更加好。到最後加埋d粥入去煮，岩岩好夠飽，不錯。最爽係當晚有世界盃睇，餐廳裏面既食客一起睇波，隊下啤酒咁，相當熱鬧。店員服務態度不錯，會推介食物予客人。