呢間泰菜館比較特別，係地庫，好彩門口有兩個泰國雕像，如果唔係都幾難搵。
晚上7點零到達，但店內仍然有好多吉位，呢個鐘數都坐唔滿其實心裡有數😮。由於其他人未到，但又肚餓，所以先叫左個香辣什錦海鮮湯粉。
香辣什錦海鮮湯粉 ($50)
大大碗，份量對得住呢個價😋；什錦海鮮都係D急凍貨，青口、蝦、魷魚，無腥味亦都無海鮮味；通菜份量比較多，健康感高；我同妹妹都好中意佢個蛋花湯，辣、酸、甜、鹹集於一身，飲完幾開胃，不過個味真係幾濃，唔可以飲太多。
1
大冬蔭功湯 ($118)
我地五個人share，每人都分到一碗；味道唔錯，同泰國飲果D差唔多
鐵板蠔仔蛋 ($98)
媽咪中意食蠔，所以特登叫呢碟；
蠔仔份量多，size比想像中既大，而且粒粒都飽滿又無怪味
，唔錯!! 炒蛋唔會太老，仲好有蛋香添~豬肉碎生菜包 ($98)
呢個都幾辣下，唔食得辣既家人，食左一啖就頂唔順；生菜乾淨、新鮮；肥肉都多，所以我食左少少算，費事挑出黎
菠蘿海鮮炒飯 ($88)
我都幾中意食菠蘿飯，但呢度呢個就唔係咁岩我胃口，海鮮無乜味都預左，但我嫌佢肉鬆同腰果唔夠多，而且個飯無乜味☹️；但菠蘿幾甜
細泰式小食拼盤 ($100)
我見之前D食評相係春卷拼蝦餅，所以就叫佢。點知上到枱係春卷拼豬頸肉….我仲以為小店改左拼盤內容，但埋單先知原來可以自由拼…不滿點解落單果陣職員唔問我地拼乜? 😫如果唔係我地之後唔駛又叫個蝦餅 (因為家人中意食蝦餅)🙄
春卷皮炸得香脆，內醃有大量粉絲加甘筍，我幾中意食😋；但豬頸肉就麻麻地，較為淋身，唔夠爽🤐
泰式香茅鹽燒盲鰽 ($118)
屋企人話食開烏頭，職員話本身可以轉，但D烏頭全部起哂鱗燒唔到，而且佢表示盲鰽比烏頭好味
職員果然無講錯😀，盲鰽肉質比烏頭嫩滑😍，燒完之後仍然保存到肉汁，一D都唔鞋，而且魚都算厚身多肉
炸蝦餅 ($88)
蝦餅份量好多，我地食到尾聲其實已經飽飽地，如果小店有細size版就好。蝦餅又係新鮮炸出黎，炸粉好脆，蝦肉又熱又彈牙，但蝦味就唔係話好鮮好重
總結，呢度D食物，樣樣都係即叫即整、熱辣辣，所以制作需時，但好在坐幾耐都得，唔會比人趕走。職員態度好，我地分左幾次落單，又要求改菜單入面既野都無黑面，不過我仍然有D耿耿於懷，自行幫我地決定左小食拼盤既內容😞
