麻辣派對 (瑞生酒店) (Closed)

嘅酸菜魚、水煮魚已經吃過幾次，因為太好食，次次都唔想轉新嘢～今次豁出去，試吓呢個推介款式：鮮椒味嘅水煮系列。呢個辣度同酸菜魚、水煮魚嘅辣度相近，order咗BB辣都幾接近。主要特色就係佢嘅鮮椒味，冇其他款式咁重蒜香和鹹味，但係麻香嘅程度非常澎湃，越食越麻辣～麻痹感覺由嘴唇漸上大腦，非常刺激！魚類揀咗江團，啱啱熟的肉質又嫩又滑，冇細骨👍🏻👍🏻配菜都落到足，同時有薯粉和水晶寛粉，仲有芽菜，豐富到不得了，兩個人都食唔完。另外點選咗一款可以走辣嘅小炒：涼瓜排骨。非常美味，堅有鑊氣！比起酒樓嘅小炒更加惹味，忍唔住都叫個白飯！同時發現涼瓜竟然可以解辣😍飲品都幾煩幾大杯，凍檸茶茶味夠，拍得住茶餐廳水準！臨走仲有桂花冰粉作甜品，絕對能夠降溫解膩。餐廳環境充滿party氣氛～裝修型格別緻。仲有派對舞會氣氛嘅燈光效果，有興致飲番幾杯食四川菜都幾過癮😍