睡飽吃吃睡飽冰店

去過睡飽吃吃食蛋糕，店舖唔定時營業，每人必須點1杯飲品，加上設入座時限，印象麻麻。不過，對佢呢間主打Gelato的姊妹店，依然心心念念想試，尤其睇到好多食評大推佢的橄欖油同開心果味Gelato，好吸引咁~

睡飽冰店的營業時間比睡飽吃吃長而穩定，2100收舖，夜啲嚟都食到，只係冇咁多口味選擇，但熱門選項應該貨源充足，長賣長有。

2000到達，同朋友點餐時剩番7隻味，買咗2杯（$78/杯，每杯2款口味；部分口味+$8），試到4種口味。

橄欖油：+$8；入口已有橄欖油的獨特味道，屬於清淡的橄欖油味，仲食得出雪糕有啲油分，令佢比其餘3款口味更順滑；佢同另外2款堅果Gelato一樣係偏鹹味；雖然呢個味道幾特別，但純粹個人喜好，覺得試一次就夠，但朋友就非常鍾意

開心果：+$8；堅果味濃，似食緊雪凍咗的堅果醬；颜色天然，呈烤烘後的開心果颜色

橄欖油、開心果Gelato

$94

榛子/碧根果仁：唔係純榛子；雖然加咗碧根果，但榛子味仍突出，質感濃稠，感覺heavy，喺4款之中最飽肚而且好易食到「漏」；自己鍾意堅果，都幾欣賞呢款口味，只係食食下會有啲膩，容易厭

黑芝麻：簡單嚟講，佢係固態版的低糖黑芝麻糊；濃濃的黑芝麻味，係我同朋友揀的唯一一款甜味Gelato

（前）棒榛子/碧根果、黑芝麻Gelato

$78

呢度環境一般，可堂食但只能立食，部分疑似檯面註明係古董，唔准摸亦唔可以放低杯雪糕。舖頭得1個店員，一腳踢，收一次錢後就入去備餐區𢳂雪糕，然後再拎出嚟交俾個客，完成咗先可以serve下個客，我哋1張單買2杯雪糕，佢每𢳂完1杯便行出嚟1次，所以，落單、俾錢同出餐都需時。Gelato的價錢同份量：幾貴，揀熱選的橄欖油同開心果就係$78+8+$8，埋單接近$100；其他唔使加錢的味道都好食，真材實料，不過，用$78買杯雪糕，性價比一般。之前食Gelato都係去Venchi，一比之下，Venchi份量大啲，味道亦更驚艷到我，始終係連鎖貴牌，貨源點都好啲，Venchi的榛子味冇寫係混雜其他堅果，榛子嚟自有認證的意大利產區，杯Gelato有一小片黑朱古力點綴，仲可以喺舖頭坐低堂食。Venchi $92（好似係）可揀4款口味，亦有杯/筒裝的選擇。撇除支持小店，睡飽冰店似乎冇乜必殺技，呢度的Gelato杰身啲，感覺冇Venchi咁易融，但食完頂肚啲、「滯」啲。