連墊枱紙都設計成報紙的分類小廣告，菜單上更有女士性感甫士剪影，未食已經令人面紅耳赤。
餸菜名亦非常抵死富玩味，例如癡膠花顛雞燉湯、鞭鞭有力湯、密密翻啅湯、後欄剋星、鬼妹搞唔餃、鬼佬中出、有排舐冰鎮飽魚、唔係椰菜花......等等。
鞭鞭有力湯($268)
鞭鞭有力湯其實即係川弓白芷當歸天麻魚頭湯，湯底呈奶白色，魚頭係另上，好大一個。
等湯底滖起，先飲返碗試味，湯底魚鮮味幾突出，唔會好重藥材味，應該好多人都接受倒。
黃金脆魚皮($88)
魚皮炸得夠脆，上面有好多咸蛋黃醬，非常邪惡！
日本廣島蠔($38/隻)
廣島蠔幾肥美大隻，不過由於上枱時係結冰，所以建議淥耐少少先好食。
A5野崎牛肩肉($398)
哩個A5野崎牛肩肉真係不得之了，雪花紋好靚好平均，每一塊都成隻手掌咁大塊。
牛肩肉淥到當半生熟就啱啱好，口感好滑帶少少彈口。
哈波子($68)
哈波子即係手打蝦丸，蝦丸好彈牙，蝦味十足。
長生不老雜菌拼盤($88)
雜菌拼盤可以在六款菌之中任選3款，我揀左秀珍菇、金針菇同靈芝菇。
家鄉番薯糖水($38)
番薯糖水入面有兩粒湯丸，一粒芝麻餡，一粒花生餡，糖水薑味夠重，食完成個暖晒，不過如果唔食得辣就唔建議點了。
總結，去滾雖然以綽頭吸客，但要留客最基本都係要睇食物質素，哩方面去滾亦冇令人失望。
