新蒸武門 (Closed)

有一期需要喺觀塘做嘢，所以嗰排成日搵吓附近有啲咩餐廳可以食下晚飯，就搵左呢一間，因為見佢個名都幾得意幾特別，本身初初以為剩係得蒸嘅菜式選擇，但去到原來都有炒炆燉嘅煮法菜式選擇。一坐低你會見到有杯茶，而呢杯茶裏面有好多材料，係紅棗菊花杞子茶，個杯都好得意，好中式化。只要你叫一個餸，佢就會送一盅燉湯俾你飲，而呢種燉湯其實已經足夠兩個人飲用，因為都幾大碗，亦都好保溫，一嚟到嘅時候熱辣辣，可以飯前先飲幾啖，飯後之後再飲嘅話亦都唔會擺到凍哂。呢一款叫做豉油王蝦，啲蝦都好大隻，黑頭好多膏，佢炒到啲蝦殼比較軟身，所以基本上係可以連蝦殼一齊食，炒得好惹味，啲蝦都好新鮮彈牙。呢款叫做豉汁帶子蒸豆腐，豆腐好滑，再配上豉汁都幾好味，而帶子都比較鮮甜，整體不錯。最後一份叫宮廷香辣雞，都幾多雞肉炒得好香口，有少少辣味，唔算太辣，所以唔食得辣嘅都唔會怕。