峰壽司 (Closed)

平時聽到日本餐廳待應叫歡迎時將"いらっしゃいませ"講到"234"都算啦，嗰次晚飯全程聽到唔係"你去死"就係"你食屎"，完全係"零"專業，仲要叫到鬼咁大聲，成餐飯令人食得好不安。一間日本餐廳有無質素同專唔專業，第一句歡迎詞俾客人ge感覺好緊要，歡迎詞講得衰，其他野ge質數都唔方好得去邊。歡迎詞講得衰都算，至於食物，啲三文魚壽司就最啱減緊肥ge人食，完全係零脂肪，要豆雞眼先揾到條線咁幼ge脂肪紋，所以無叫，諗住叫火炙三文魚壽司會好啲，點知反轉件魚嚟睇，一樣係咁瘦，我食過啲比較平ge壽司店都揾到橙白間紋三文魚壽司，但呢度只揾到橙色ge三文魚壽司，有無人可以話我知呢隻係咩品種三文魚呢?可能啲靚ge部份攞晒去做刺身掛....但都唔應該係咁囉。我地仲叫咗吉列蝦卷，燒汁大帆立貝壽司，火炙帆立貝壽司，特長三文魚壽司，北寄貝壽司，北寄貝沙律壽司等等，味道都ok，啲料都算新鮮，但啲壽司飯就硬咗啲同埋好散，未夾已經見到個樣係散ge。食後我同朋友分享，友人話旺角分店好食啲，我就唔敢再試啦，如果大家有興趣都可以慕名去試吓係咪真係值得咁多人排隊去食，反正價錢唔算貴。