麵軒 (Closed)

同朋友係沙田UA睇完戲，係附近搵飯食，但好多間都滿，我見麵軒唔多人等提議去食，不過有朋友力勸話唔掂，話寧願等其他，不過基於大部份人都肚餓，所以都係去左麵軒食。我鐘意食牛肉，叫左個佢地的招牌牛肉麵，可能因為我食麵好重視個湯底，佢個湯底已經令我覺得佢不差，飲落應該係牛骨，都飲到紅蘿蔔味；而牛肉都叫大大片，連筋，有咬勁，都叫爽口，入味。麵條本身都不淋，都仲可以一條條咁夾起食，整體而言距離朋友所形容的難食相距甚遠，但另一款小食真係可以唔叫，就係芝士餃子，我以為係咩特別野，原來係一粒芝士整溶佢做醬。我諗呢間店另一個可取的地方係侍應態度都好好，即叫即到，雖然個麵本身都成五十蚊，不過如果搵唔到地方落腳，都會再幫襯呢間。