SuperNormal (淘大商場2期)

Open Now

Now Closed

朋友講到呢一間位於九龍灣嘅西餐廳超好食，特別係個德國豬手，又話好難訂位好多人都話正，咁就去試下啦，結論如標題「唔係唔好食，不過無好似D食評講到咁好啫」Order了必食推介嘅豬手，差唔多篇篇食評都讚不絕口，我自己覺得以$188黎講算係合理啦，皮脆肉嫩好食嘅，不過Size就比其他地方差唔多價錢嘅德國豬手就細隻咗少少，可能對佢有D期望所以覺得有少少失落感。重申，係好食嘅，只係之前的食評有D over咗。焗蟹肉大啡菇真係好多蟹肉，足料，不過就好似因為太多蟹肉而失去咗大啡菇嘅味道，如果Balance會更好。呢個法式牛肉批就係失敗中嘅失敗，我朋友就係誤信D食評所以叫咗，可能法式牛肉同我心目中嘅牛肉係兩樣好唔同嘅野黎啦，不過真係完全無牛肉嘅感覺，而佢個酥皮唔鬆唔香仲要上枱時已經甩咗出黎，講真呢2片切成4片嘅野賣$88真係有D過咗火，估計都係外面買返黎焗番熱佢嘅貨色，不過我覺得既然質素唔掂就不如唔好賣啦，出面其他小食/餐前菜選擇多的是，無謂整衰自己個招牌啦。