Hero's Friday (黃埔新邨) (Closed)

Bookmark咗佢地中環店一段時間，見佢終於都開到嚟黃埔，咁梗係趁食飯時候去試。呢個漢堡店除咗食手打牛肉漢堡之外，當然要試佢地既「panger」。顧名思義就係pancake加burger，呢度你可以加$10轉用pancake取代麵包或者叫佢地指定既「panger」，例如煙肉蛋、豬柳蛋，就冇手打牛肉做餡。咁我第一次食就試咗佢哋嘅classic burger轉左pancake。呢度每款burger都係跟餐，包薯條同埋一罐飲品，大約$60-93不等。如果你唔想食基本薯條，你可以加錢轉例如$5薯角或者$8甜番薯。見到佢基本薯條都係我鐘意嘅粗薯條，所以我就冇特別轉。呢間舖頭係冇堂食，係外賣店。我今日平日1點到，由我來落order到拎走就大約等咗8分鐘。一打開個包，賣相不錯。Pancake厚身得黎好鬆軟，帶少少甜味，好好食！手打牛肉肉汁滿又唔會太乾，至於生菜同蕃茄都新鮮，讚！另外，面嗰個醬汁好似係淡口嘅芥辣醬，味道同整個包都好夾。而包薯條都幾大包，薯肉飽滿，好食😋我覺得以手打漢堡而言，呢間舖性價比好高，絕對值得回頭幫襯！