假日大排長龍嘅咖啡弄, 原來平日lunch time唔使等位嘅!
呢日1點幾去到, 估唔到即刻有得入座!
我地叫左草莓冰淇淋鬆餅同燻雞吐司披薩,
飲品我揀左蜂蜜生薑茶, 朋友就揀左冰維也納咖啡
先講我個飲品, 打開個壺, 見到入面真係一片片薑, 真材實料, 唔係開粉溝水
不過亦都係因為咁, 所以雖然有蜜糖, 但杯野真係好辣,
原本侍應話飲晒可以再叫佢地斟水, 但我都冇再加了
叫呢個蜂蜜生薑茶, 其實係因為睇中配生薑茶嘅芝麻脆餅, 好香芝麻味好脆
朋友果杯冰維也納咖啡我冇影到相, 不過杯野好高好多cream
隻調羹唔夠長, 結果一不小心, 成隻調羹埋左係d cream入面.........
1
燻雞吐司披薩要焗, 要等耐d, 但我地又好肚餓, 所以決定草莓冰淇淋鬆餅唔駛後上, 食左先算!
咖啡弄嘅鬆餅係名物, 都唔駛我多介紹, 今次去食依然keep到水準
外面香脆, 入面鬆軟, 暖暖嘅鬆餅同冰冷嘅雪糕好match, 士多啤梨亦夠香甜, 所以我地好快清晒~
食完甜點先食鹹點, 燻雞吐司披薩即係雞肉+番茄+芝士嘅open sandwich,
唔算好驚喜, 不過都幾好食, 旁邊嘅一球蛋沙律都唔錯
咖啡弄有一大幅綠色植物牆, 本身環境幾舒服,
可惜因為太多人, d位又逼, 所以好嘈...
聽到晒隔離檯兩個師奶講是非, 講自己個仔去外國讀書d野,
又聽到後面果檯個d小朋友點樣大哭大鬧係度扭計,
如果想靜靜地同朋友傾偈就唔好揀呢度啦~
走嘅時候大約兩三點, 開始tea time, 見到門口開始有人等位, 真係慶幸自己嚟得早！
