先來既係壽司~ 長形既碟上面整齊排列咗一行壽司，好靚~
海老壽司非常鮮味，入口即溶，上面果pat係wasabi來既，雖然顏色唔多似，所以都係建議唔食得辣既朋友移走上面pat wasabi先
沙律軍艦雖然上面唔係滿滿既沙律~ 但係少少一pat反而食起來更加方便~ 好多時食沙律會有種求其搵材料再hea擠沙律醬撈埋算數既感覺，但係呢pat沙律明顯係用心整既
仲有鰻魚芝士卷，自己唔多食芝士~ 但係朋友就話勁正，我偷咗上面舊鰻魚來食，又真係好夠味，而且好滑冇細骨，仲有少少甜甜地既汁，我估計食晒成舊既話應該都真係幾正!
刺身方面，由於場地燈光唔夠影得唔清就唔放相啦~ 魚生好肥美! 而且夠凍夠新鮮，絕對唔會係好似啱啱溶完雪攞出來果啲咁~ 刺身種類算係多，不過冇吞拿魚就爭咁啲… 最欣賞係佢既甜蝦同埋海螺片
甜蝦大大隻之餘好夠鮮甜，唔會有啲苦苦既蝦汁~ 海螺片雖然叫海螺片，但係佢切咗做一粒粒，食落非常爽口而且鮮甜，只好係咁order!
呢隻係特色手卷~ waiter話特色手卷=廚師想整乜就乜，random口味手卷呢個設計認真唔錯，又可以比食客有啲驚喜，又可以比廚師發揮發揮~ 來到既呢隻似付味螺肉(唔知係咪咁叫)既東西，橙橙地色既螺肉帶點微辣，食落爽脆有咬口，螺肉味又唔會被覆蓋，恰到好處:)
玉子本身我以為係凍既~ 但原來暖既同樣好食~ 甜甜地既蛋配甜甜地既醬，一啖一件，唔會整得太熟之餘蛋味香濃~
雖然我唔特別鐘意食炸嘢，但炸蠔都稱得上係放題必點之物~ 金黃色脤卜卜既炸蠔咬落外脆內嫩，鮮甜蠔汁慢慢流出，蠔味非常濃郁，仲帶點海水味
炸粉唔會沾得太多，比例一絕~
