呢間餐廳主推浜燒，所以係每張枱都會放置左一個爐，最好嘅地方係當你揀好想食啲咩海鮮，海鮮上枱嘅時候就會有店員幫手燒，只需係旁邊等食就得，咁就唔洗擔心自己會燒得唔熟/過熟啦！而且係旁邊睇住海鮮慢慢變熟嘅過程真係好治療好滿足，唔洗自己動手，食都食得開心啲
我地揀左四樣浜燒食物，分別係：蟹甲羅($136)、大蝦($136)、帆立貝($136)同活蜆($48)。四種海鮮都十分新鮮，所以就咁燒熟無咩落調味料都已經好鮮甜。
當中我最鍾意就係蟹甲羅，鵪鶉蛋撈埋蟹肉嘅配搭真係好好食，而且蟹肉份量好多，啖啖蟹肉好有口感，口感豐富到好似食緊飯咁
另外，我地都叫左啲刺身、壽司、小食，整體質素都幾好
.
海鮮青芥沙律 ($68)沙律菜無咩特別，不過三文魚、甘油魚刺身同蟹籽都幾新鮮，所以食落幾fresh，當頭盤唔錯。
樂•五點刺身($368)沙律上面個幾塊刺身又點滿足到我地，所以我地再叫左呢一盤刺身，我地叫左三文魚、呑拿魚、油甘魚、牡丹蝦同原隻赤貝，顏色繽紛，望落好吸引，食落都好吸引，因為刺身新鮮，所以我地食得好滿足。當中令我最surprise係原隻赤貝，因為食落好爽口，比起平日出面食到嘅赤貝好食D。
蒜燒牛舌($68)串燒係my favorite，而牛舌基本上係我每次必叫嘅野食。雖然話係蒜燒牛舌，但無咩蒜味，食落同普通加左海鹽燒嘅無咩分別。呢到嘅牛舌唔算好厚，但咬落去口感幾爽口，幾juicy，都唔錯。
雞皮餃子($98)係Menu上面見到呢個餃子覺得幾特別，於是叫黎試下
無諗過雞皮可以用黎包餃子，食落一啲油膩感都無喎。雞皮煎到好香口，餃子料淡淡地，兩者出奇意料地夾，Bite-sized餃子真係好方便，可以一啖一隻。
加洲卷($68)呢個加洲卷同一般食嘅有啲唔同，蟹粰係擺係卷物上面同加左沙律醬，我都幾鍾意沙律醫，所以都算ok。
白桃梳打、巨峰乳酸($68 each)飲品好大杯，味道都唔錯，唔算太甜。我鍾意餐廳會係飲品入面加入果肉，令到整體口感更好。
總括黎講，餐廳食物質素、服務同環境都唔錯，會再次到訪！
