我地7:25到，環境我覺得幾ok，坐得舒服。一開始佢已經講明限2個鐘，我地亦有心理準備，於是一開始就係咁tick嘢食。而且因為有好幾個食評都話有漏單情況，我地真係一d都唔客氣係咁tick。結果全晚都冇漏單，嘢食都嚟得好快。有個friend仲唔小心tick咗3個牛肉鍋，因為佢見我地tick刺身係tick幾多件，又以為份量唔多，結果連埋另一個friend tick嘅一客，嚟咗4個牛肉鍋! 我地6個人放到成檯都係，所以不斷係咁食!
講番食物本身，種類都ok，刺身真係好新鮮，不過唔算好多款，之前其他網友提過有鮮帶子，但係冇得tick喎。另外網友話有清酒煮蜆，但宜家得番牛油炒蜆。我覺得味道ok，主要係胡椒味，但我d friend覺得怪。串燒同其他燒物都好味，牛肉鍋都ok。蟹粥都幾足料，有好多蟹，不過味道普通，我d friend話值頭係唔好食。雪糕有4個味，我食咗綠茶，非常正~ 如果唔係太飽，我都真係想試晒佢。
服務方面，有個男manager好有禮貌，非常好。我d friend話女嘅waitress就麻麻地，因為佢地咗路口上菜位，所以我都唔係好知。不過最後上雪糕嗰個女仔就真係態度唔得。我地6個人坐窗口卡位，張檯當時放滿嘢未收得，佢放低頭兩個我已經係pass入去俾裡面嘅朋友，但係佢繼續遞過嚟仲要好惡咁話「傳入去啦」，我唔記得佢有冇加唔該係前面，但佢d語氣真係好差，連我平時咩都冇所謂嘅人都覺得佢差，我隔離幫手傳緊個friend都話打個突。最後夠鐘前3個字左右，有個女waitress同我地講要準備埋單同交檯，同埋advice我地盡量食埋檯上嘅食物。當時檯上兩個鍋剩番少少津白、3件卷物、半碗蟹粥、幾條跟本冇人叫過幾多春魚等等。我都唔想浪費食物，所以我好飽都再食咗少少，不過我個friend好唔滿意個waitress咁講，因為佢覺得d嘢整得唔好食，冇理由迫個客食晒佢。不過我覺得佢都係建議啫，冇迫我地一定要食晒，亦唔係食淨要加錢。所以呢d說話算唔算唔禮貌就見人見智喇~
6個人食成千蚊都幾貴，不過話晒係任食任飲汽水啤酒雪糕，$168加一呢個價錢食到好味嘢日本嘢都算係咁。其實間餐廳唔算大，但呢晚竟然坐唔滿，都幾srurprise。可能因為星期五大家第二日唔駛返工，所以夜d先嚟食宵夜。我地走嘢時候門口有好多人等緊。
走嘅時候先留意佢地寫住生日正日嚟食、有5個人以上又有訂位會有蛋糕。不過我個friend其實唔係嗰日birthday，所以都係冇得送。
