桔梗 (Closed)

桔梗換左新menu之後好似去左台灣既cafe，夜晚就係台式小酒館，有酒飲又有shisha，總之就係好chill。周末黎食個Brunch好驚喜唔算太多人，枱與枱之間夠晒闊落，又開陽，係度食飯飲野身心都舒暢晒。Day time 有定食，主菜5揀1，溏心蛋，小菜同白飯。主菜叫左每日手打蝦餅，聽個名都知新鮮，蝦餅食到粒粒爽口既蝦肉，好有誠意同埋岩減肥人士。溏心蛋烹調得剛好溏心而不會流心，食落外皮有少少滷水味，就咁食唔會過咸，配飯都一流。白飯圓圓地似珍珠米。炙烤鮪魚伴芥辣蛋黃醬，好可惜鮪魚咁岩個位有筋影響整體口感，要不然配飯餸酒都唔差，醬汁幾日式。牛肉可好餅配柚子沙律係最滿意既小食，脆而不油，入面軟綿綿既牛肉薯蓉調味適中，沙律酸酸甜甜，仲可以用生菜包住可樂餅食，會有驚喜。食完正餐，加埋個飯後鹹點bacon scone，呢隻味好特別，加左香草，唔太中意食甜品既人點呢個配杯咖啡會幾夾。Oat milk Dirty 好香滑，mango oat milk shake 又係好香濃燕麥味，口感超滑順，次次黎都點，可惜今次冇晒 berries 味。