餐牌有主食，套餐，釜飯，涮涮鍋，小食同飲品。今日例牌叫左一個套餐，已經包左兩款招牌菜同兩支汽水，另加一個飯同一份小食。
套餐係吉列牛定食 + 咖哩忌廉烏冬（小辣）+ 2汽水，價錢$256另加一。
吉列牛定食
吉列牛係來自韓國嘅菜式，絕對係必食之選。牛肉係美國牛裡脊肉，今次係兩細塊，上枱時已經係3成熟，可以每邊燒2秒至半熟，或者等你自己喺個爐仔上面烤到自己鍾意嘅熟度先入口。牛肉明顯見到中間係生肉嘅深紅色，外圍就係粉紅色。牛肉燒熟啲都唔會韌，肉質唔錯。
跟吉列牛有蒜味沙律醬同甜酸燒肉汁等你點，仲有wasabi，個人最鍾意蒜味沙律醬，因爲令到塊牛更香滑。伴碟有少量胡麻醬梛菜絲沙律。定食包兩款前菜，分別係一粒車厘茄切開兩半加左胡麻醬同一細磚加左胡麻醬嘅豆腐。
仲跟一碗白飯，上面撒滿飯素，同一碗正常有昆布既味噌湯。
咖哩忌廉烏冬
招牌咖哩忌廉烏冬係另一必食之選。大碗烏冬上面滿佈白色忌廉同少少蔥花。忌廉同咖哩香加埋原來好滑又唔太膩，味道其實係日式咖哩既甜甜地，好好食。餐牌寫明小辣，但係我覺得基本上完全唔辣。讚岐烏冬係粗身而有少少嚼勁同勁滑，好好味。其他配料有唔少牛肉粒，都算幾腍吓，另外仲有洋蔥。
流心蛋韓式牛肉飯 $78 另加一
流心蛋韓式牛肉飯大大碗，飯面有10塊肥牛同洋蔥絲，中間一隻大大溫泉蛋，可以整穿就有蛋汁撈飯，上面灑上白芝麻粒同蔥花。甜豉油份量夠多，飯唔乾。食完實飽肚。
韓式甜辣醬單骨雞翼 $68 另加一
韓式甜辣醬單骨雞翼一客5隻，雞翼單骨好易食。雞翼塊皮少少脆，味道甜甜地，食落完全唔辣，落到喉嚨先有少少辣，上面灑上白芝麻粒。
餐飲可加錢升級其他飲品。
熱韓國蜂蜜紅棗茶 跟餐加$8 另加一 凍韓國蜂蜜紅棗茶 跟餐加$13 另加一
韓國蜂蜜紅棗茶下底有好多紅棗碎，飲落味道帶淡淡紅棗味，完全唔甜。凍同熱味道都差唔多。
今餐飯食完都夠飽呀，上菜快速，效率高。
