事關次次黎呢度食都係同飯伴既一大班朋友一齊食, 為了唔阻住大家食野, 我都冇特別每黎一樣食物就影相...又但係冇相既食評又唔係我既作風喎....! 所以食左咁多次...今次先正正式式寫食評喇! (其實都只係得一張相咁大把...=_=)
先講下呢度既環境, 佢都有唔少係沙發的位置, 如果4-5人去食應該會坐得幾舒服, 但係如果人再多D就會有D迫...
入正題! 先講雞煲, 我地6-7人去食叫一隻雞, 每人都可以食到4-5件雞, 所以雞既份量都唔少; 至於辣度方面, 我地每次都會叫"微辣", 會比小辣更少辣, 雞件都幾滑, 同埋佢個醬汁非常好食! 超濃郁! 我地會叫多個炸魚皮沾呢隻未加湯的醬汁去食, 又係勁好食!
講多少少個炸魚皮, 佢地係即炸熱辣辣咁上檯的, 而且加入湯既時候你會聽到"沙沙聲", 即係好似食蝦片果陣吸水既聲音, 非常推介的食物!
食完雞之後就加湯打邊爐; 因為食左咁多次其實佢既水準都Keep得好好, 等我綜合一下去介紹一D特別既食物喇!
1. 豬皮 - 只要你夠耐性一早放佢入去滾但係最後先食佢, 佢就會吸哂D超邪惡既雞煲湯底同"炆"到超軟...非常好食!
2. 牛肉 - 不會太肥, 而且很有牛味, 不是一般的肥牛貨, 當然價格也會上升一點喇~
3. 手打蝦丸 - 呢個又係好好食, 食到蝦既鮮味之餘又好彈牙, 真係有手打既口感。
4. 蘿蔔 - 不是非常甜美的那種, 還可以喇~
5. 韭菜餃 - 每次來到都必吃的食物! 呢度個韭菜餃真係好好味! 食落去個感覺好似自己人手包咁~ 入面個餡料都好足~
6. 烏冬 - 呢度既烏冬真係食到係稻庭烏冬既質感, 只要滾一陣就已經好"林", 如果煮太耐會爛, 但係真係好好味!
我最有印象既就係以上既食物, 如果冇特別提及既, 味道都不過不失的; ,至於有冇D咩係我食過覺得不好吃的, 印象中就沒有了....
