度小月 (海運大廈) (Closed)

三兩知己喺尖沙咀海運大廈行完街就去咗呢間係LCX 3樓嘅《度小月》食晚飯。餐廳裝修好有台灣風味，餐枱同餐枱之間嘅距離都幾闊落，坐得幾舒服。擔仔麵 ($28/碗) - 賣相精緻，湯底帶有好香嘅乾蔥味及芽菜的香甜味，味道豐富融和有層次，麵身滑溜帶點彈牙，加上新鮮彈身鮮蝦及惹味肉燥，相當滋味！烤紹興香腸 ($28) - 香腸衣烤得彈牙中帶點香脆，腸肉軟硬適中，味道香口鮮美，配唔配蒜片都好食。特滷大腸 ($48) - 大腸軟腍滷得入味之餘又保留得大腸本身的香味，加上炸香嘅薑絲，味道相當唔錯。鳳梨蝦球 ($118) - 蝦球表面嘅炸醬炸得鬆化，蝦肉爽口彈牙，配上酸酸甜甜嘅鳳梨醬及新鮮鳳梨塊，香甜好食又唔油膩。灸烤胡椒肉 ($68) - 肥瘦交替的豬肉爽口彈牙，肉味香濃，表面嘅胡椒粒相當香口，配上酸酸甜甜嘅醬汁，香而不膩。櫻花蝦九層塔煎蛋 ($68) - 煎蛋香口又唔會太乾身，煎蛋入面加有櫻花蝦、九層塔……等，以簡簡單單嘅食材，帶出得豐富美味。食完埋單原來惠顧滿$380可以參加抽獎，分分鐘有機會免費飛去台灣再嚐《度小月》。