永樂冰室 (Closed)

前身係四海遊龍鍋貼專門店，易手之後叫做永樂冰室。但係嘢食基本一模一樣，但每碟菜平均價錢就貴咗十蚊到，喺中環嚟講算係中價餐廳。餐廳位於香港站，係地鐵店舖。人流唔算非常多，隔離添好運就要排長龍啦。我個朋友點咗台灣麻辣湯麵配牛肉，我都試咗幾啖。真係好辣！要keep住飲凍野解辣。牛肉肉質尚算可以OK，口感都幾好，麵身採用扁麵。既然係招牌菜當然要試下呢度啲鍋貼啦。三件鍋貼份量啱啱好。因為唔係主菜，都傾向唔食得太飽。鍋貼味道一般，個皮好容易鬆左出嚟。另外，我就點咗台式肉燥飯套餐。套餐包一碗湯，都幾好味，唔算太鹹，份量適中。至於肉燥飯，揀咗配雞扒。超多肉燥鋪喺飯嘅上面，好滿足。雞扒唔係太大塊，味道香口，唔算太油膩。另外仲有兩條菜，不過賣相一般。 另外點咗杯凍豆漿。豆漿香濃，唔會太甜。 埋單一個人大概六十蚊，畀個餐牌大家參考下。如果搵唔到位嘅或者趕時間嘅話，喺餐廳出面買外賣都幾方便。