金先生韓膳館 (Closed)

呢排真係凍到人都癲，日日都要著到好似隻糉咁出街。呢一晚同個好朋友出黎食飯見下面(因為我地都成兩個月無見，而且我都好耐無出過去食過好野)，我地係嚴寒之下去左食韓式晚餐。原來金先生都已經開業左一年啦，不過夜晚好少人去，我地一路食一路驚佢會執笠。佢係一間韓式食肆不過係無燒烤食，可能係呢個原因所以少人去幫襯囉。個老闆娘好好人架，前菜有好多選擇，而且你食晒只要你想食開聲就可以免費添加，仲要檯檯都有少少唔同添。由於得兩個人，我地叫左少少野即–一個柚子沙律、韓式炸醬麵同埋金先生特式鍋。至於飲品呢我地就要左一個菠蘿燒酒。個沙律唔係好似泰式咁，拆晒d柚子肉出黎就算，佢係個汁到都加左柚子汁所以就算係食菜都有好勁既柚子味。朋友睇左【茶煲阿四】所以話一定要食炸醬麵，不過我個人覺得似係北京食到個d炸醬麵多d，個麵豉醬真係好似。朋友話無黎味道，不過我就覺得都唔錯啵。個鍋一上我就飽左一半啦，我唔覺得我食得晒囉。有茄汁焗豆、午餐肉、公仔麵同年糕之類，不過真係好辣，後來都係要加水。朋友已經講左未來三次食飯都要係呢間，你地會遲d又見我post 呢間野出黎架啦。