全記點心專門店 (Closed)

某日行去搭車準備歸家, 發現兆和街多左間點心店, 由門口睇入去裝修幾新潮, 唔係舊式果種, 所以呢晚無飯開, 一於過黎試下.環境乾淨, 坐位闊落, 而且多卡位, 感覺良好.大路既點心, 蒸飯, 粥品等, 價錢由十幾到廿幾.仲有D自家特式制作, 以黑松露做賣點.仲有呢個點心孖寶, 早餐, 下午茶連宵夜都有, 可以黎飲夜茶, 荃灣好似較少.黑松露野菌餃, 呢款唔係度度有, 粒粒都漲卜卜, 皮唔會太厚太乾. 一咬開D餡料多到爆出黎, 一條條既野菌有咬口, 黑松露同菌類既香氣充滿整個口腔.鵪鶉蛋燒賣, 好懷舊既點心, 鵪鶉蛋細細粒, 一啖入口, 皮薄肉嫩.古法馬拉糕, 好軟熟唔會死實實, 唔乾而且有蛋香.义燒蒸腸粉, 腸粉夠滑夠薄, 义燒夠多甜甜地, 感覺滿足.呢度D點心係即叫即蒸, 所以時間會長DD, 不過就碟碟都熱辣辣. 而呢度D茶係用陸羽茶包, 乾淨衛生, 亞姐仲會間唔中幫忙加水, 服務夠讚.