本身覺得打邊爐分別唔大就無咩特別期望, 但係一坐底調完個醬料之後, 奇怪事情就開始發生喇, 侍應出其不意地遞上每人一個燉湯, 我心諗乜我地黎唔係黎打邊爐既咩, 點解會有湯飲架呢
有湯飲就當然唔客氣喇, 個燉湯味道尚算合格既, 可以俾我地濕一濕個口等口腔裡面既唾液線進入準備既狀態, 不過個湯既溫度唔算太高, 如果能夠再熱返少少應該會係好飲啲既, 飲到一半個侍應突然之間搬左個爐出黎, 我望一望入面見到原來係個雞煲, 又再比佢殺個昔手不及, 完全無心理準備會食雞煲, 而且雞煲當做前菜我亦都係第一次, 侍應話要隔幾分鐘炒一次, 總共炒四次先食得, 既然係咁我當然就繼續專心享用埋個湯先啦
1
不過我既專心好快就被打斷左, 侍應在側面又遞上另一樣菜式, 今次拎上黎既竟然係花膠同鮑魚, 我心裡面對於打邊爐既疑問又膨脹左, 開始懷疑係唔係去錯左地方.
不過花膠鮑魚都出現左同一個問題, 就係溫度唔係太夠, 甚至有少少凍
一邊食住花膠同鮑魚, 中間就聽到滋滋聲代表個雞煲開始進入狀態, 直到有一刻聞到雞煲既香味以倍數增強我就心知道啲雞已經準備好, 因為我地有幾個朋友都怕辣, 所以BB辣級既雞煲正好保存左我條舌頭上面幾千個味蕾細胞既知覺, 比我有得用完整既舌頭繼續感受甜酸苦辣, 啲雞係夠嫩同夠香既, 不過我都係要嚴守胃部入面既空間, 因為我係黎打邊爐唔係黎食雞煲既!
食完前菜(雞煲), 仲未打得邊爐! 因為侍應捧左一大盆刺身出黎, 隻蝦都算幾大隻, 整體質素都可以媲美日式餐廳!
過左幾分鐘, 主角邊爐終於到喇, 黎到眼前既就係隻”溫泉雞”, 原來意思係用個挖空左既冬瓜載住一隻雞! 侍應拿起較剪三倆下手勢就將隻雞分開左, 感覺有啲似街邊處理牛雜既手法
雞既味道就比較一般, 不過好快大家既專注力就被打邊爐既配料吸引左, 侍應搬左一盆勁多款式既海鮮拼盤同埋雪花牛肉比我地, 我地發現得個冬瓜中間部分有加熱既效果, 所以煮熟食物既效率好似有啲低, 侍應好快手就幫手拆左個”溫泉”
(拆卸前既情況
)
去到最後我地連個溫泉既屍骸-即係冬瓜都食埋, 整體所有食物加埋質素上我地都覺得幾滿意, 對比個價錢其實都幾抵, 其中最美中不足既係沒有酒精飲品或者啤酒供應!
溫馨一提如果想黎依間私房菜食飯建議可以訂早少少既時間(例如6pm就開始食), 原因並唔係因為要計時或按時段收費, 而係因為真係有多野需要食, 正常速度進食係要食足全晚幾個鐘!
