我地七點未到黎到已經有幾枱人，去到7:30基本上已經坐滿人。
人和月嘅任食打邊爐分左三個價位，黃金時段$228/$298/$378，除左豬牛海鮮滑類係QR code落單之外，其他醬料、火鍋料、麵食、野飲同甜品都可以喺出面自己拎。
自助區嘅火鍋料選擇唔算太多，主要係丸類同蔬菜。
麵類方面，除左大路嘅出前一丁同烏冬，仲有火鍋粉，即係類似寬粉咁。
野飲方面，除左韓牌果汁汽水，仲有三款自家涼茶。
甜品雖然冇雪糕，但就有豆腐花同芋圓，都幾有心思。
自家涼茶有三款揀，唔會太甜，都幾潤喉。
自家韓式芝士雞 - 人和月同其他任食打邊爐最大唔同，係打邊爐之前除左可以食麻辣雞煲，仲有老檀酸菜魚或者韓式芝士雞揀，我地就揀左後者。芝士雞上面有超多芝士，雞件其實已經熟，只係開火熱溶啲芝士再撈一撈佢就食得。
雞件甜味為主，辣度只係BB辣，雞肉唔會太鞋，芝士拉絲效果明顯，中間仲有年糕，所以都幾飽肚。
川式麻辣湯 - 湯底有六款揀，鴛鴦湯底另加$30。麻辣湯冇辣度選擇，辣度大約係小辣至中辣之間，裡面只有辣椒同大蔥，如果想要鴨血或者豆腐，可以經QR code落單。
我地揀左大滿貫吃到飽套餐($378)，佢包左八款唔同部位嘅牛肉同海鮮盤。
上完湯底，侍應會即刻上埋一盤八款牛肉，每款牛肉上面都有名牌，排得好靚，其中除左牛小排同封門柳之外，其他都可以免費追加。而可以免費追加嘅牛肉入面，我就最鍾意外裙柳同牛胸爽，前者帶啲咬口，後者就食落好爽口。而再追加嘅牛肉除左比較細塊啲同解凍得咁好之外，質素都同第一轉唔差太遠。
海鮮盤包左海蝦、鮑魚、扇貝、青口、帶子同兩三款唔同蜆，全部都好有睇頭。
墨魚滑&蟹籽蝦滑 - 兩款滑都好彈口，兩款之中我比較鍾意墨魚滑，因為佢比蝦滑更彈牙。
鴨血 - 我地點左麻辣湯底點都要配鴨血，佢一份只有兩件，唔怕一次叫得太多冇人食。鴨血好滑都幾彈口。
牛柏葉 - 好爽口一啲都唔韌。
鯇魚片 - 鯇魚片都幾腍滑，不過因為切得比較薄，快灼幾秒就食得，否則會變到太腍唔好食。
廣島蠔 - 雖然係雪藏貨，不過都幾厚肉肥美，但就要灼耐少少先食得。
豆腐花 - 係新鮮豆腐花唔係現成貨，豆腐花幾滑，除左可以加黃糖，仲可以加芋圓、小丸子、椰果......。
總結，火鍋料選擇雖然唔算太多，但鍾意食牛嘅就啱晒，因為都有好多款唔同牛肉可以任食，最貴嘅大滿貫set，比中間價嘅set只係相差$80，但就多左三款牛肉同有海鮮盤，如果本身想試多幾款牛又鍾意食海鮮其實大滿貫係抵食啲，我最鍾意佢頭盤除左麻辣雞煲，仲有韓式芝士雞同酸菜魚揀，而且食完唔洗加錢都會幫你換鍋先打邊爐，唔怕成鍋都係油。服務方面，QR code落完單野食都好快上枱，收碟都快，但留意返因為任食係限時120分鐘，所以QR code落單要喺入座後90分鐘內完成，而落單頁面都可以睇倒剩餘時間。
