今次搵到呢間係寬成樓上面既樓上餐廳: 美味故事，又多一個食飯好去處。
上到黎發現入面原來都幾大。
仲有音樂表演場地，下次有活動其實可以book呢到，有埋器材添。
餐廳有趣既地方係用微信落單，有埋教學添。
從前菜到甜品，每一步都有得自由搭配，然後自己係微信上面點返自己既心水選擇。
有選擇困難症既我揀左好耐先落到單，不過都好，
由前菜、餐前小食、主菜、湯、甜品、飲品，全部都係自己鍾意食既。
一落完order即刻有杯鮮果沙冰做餐前小食，冰涼清爽，食得出幾香既芒果味，口感好順滑，非常開胃。
餐湯我揀左蘑菇湯，質感好綿滑，食到d蘑菇粒，幾足料。
前菜係有三樣野，放埋一齊好精緻。
三樣野分別係韓風豆腐餅、日式麻醬蟹柳沙律，同埋蒜蓉包。
三款既口感、味道都分別好大，豆腐餅比較軟綿綿，蒜蓉包就香脆，沙律就清新爽脆。
一次過滿足三個願望，味道變化好豐富。
之後到主菜，我揀左黑松露芝士薯蓉焗大啡菇配芝士蜆肉意粉。
其實淨係個大啡菇我已經覺得有d飽，加埋個意粉真係不得了。
大啡菇既黑松露味好香，配埋同樣香濃既芝士，令本身冇味既大啡菇既味道變得好豐富。
大啡菇肉好厚，啖啖肉，但比食肉健康，食完都唔會有罪惡感。
甜品揀左紅豆奶凍，奶味幾香，唔會太水，配埋紅豆幾夾。
飲品就揀左熱既花茶，透明玻璃杯好靚啊，洛神花養顏得黎又好味。
呢間總括而言性價比幾高，一餐包左好多款小食，主菜都係用心之作，值得寫低推介比大家。
