M3 Italian (Closed)

雖然平時好少去大圍，不過一早都知道大圍火車站附近，其實真係好多好嘢食！今日咁岩上網買咗野要來呢度交收，咁不如順便食埋晚飯啦！經過呢一間西餐廳，見到裝修好似好特別好靚，門口係一個落地嘅紅酒櫃，超級有氣派，於是乎就入去試吓！呢度嘅餐湯，今日係南瓜湯，入口超級濃烈嘅南瓜味，滿口都係南瓜蓉，好足料好夠味。跟住叫埋M3沙律(煙三文魚，巴馬火腿)，沙律嘅前端有三個細嘅碟仔，分別放左三款唔同嘅醬汁，沙律裏面有我最鍾意食嘅煙三文魚，仲有超級好味嘅巴馬火腿，作為一個前菜來講，健康得來好夠味道，超級濃烈，正！最值得一提，就係今晚嘅主角:西班牙乳豬！外皮趣卜卜，一放入口嘅時間，簡直好似喺口裏面燒炮仗一樣嘅感覺，而且脆口得來一啲都唔硬，肉質鮮嫩，林治治！真係而家諗返轉頭都肚餓。雖然大圍對於我來講唔係十分之近，但係我好肯定我會再嚟。