煲仔粥 (Closed)

講真, 要食好靚海鮮ge話~ 你唔應該黎呢度. 你亦唔使expect呢度招呼好環境賣相一流食物好食過出名大酒樓.
不過個人覺得呢度ge食物質素配以佢ge價錢真係超哂班. 我自己好鐘意食海鮮, 幾乎試勻所有海鮮勝地(西貢,長洲,流浮山,鯉魚門,布袋澳), 都會選擇翻兜呢間"煲仔粥", 因為佢價錢真係抵~ 而且d野夠新鮮, 所以我一海鮮癮起又無咩人一齊食就會黎呢度~ (其他海鮮餐館一定要多人先易叫野同抵食)
講完廢話連篇ge開場白~ 黎左呢度好多次, 次次同bf都會叫到成檯海鮮, 兩個人試過最貴食左$195, 隔離檯4個男人都係食$200度, 不過真係食到我同bf反肚咁滯... 之後行幾個鐘頭街先落到格~ =) 同埋雖然間舖係細同迫夾, 不過ar姐服務尚算好, 落單快上菜快收碟都快~

去左咁多次覺得必食ge野:
豉椒炒蜆+蟶子(雙拼$35, 單拼$30): 最重要係做到乾淨無沙, 蟶子好爽, 蜆夠鮮, 而且炒得好入味同唔油~
沙嗲粉絲吊桶煲($35~40): 試過叫蒜蓉蒸但搞到吊桶太老, 唔好食; 但叫煲d火喉就次次都好好, 沙嗲味好夾d吊桶, 唯一唔好係粉絲太少唔夠喉.
白灼東風螺($25)//辣酒煮花螺($45): 灼螺好鮮甜, 但我個人鐘意辣酒煮螺~ 叫完最後一定加多碟灼螺倒埋落去... 同埋d辣酒底好食過好多酒樓, 送飯一流, 我甚至可以就咁飲落肚.
避風塘雞翼(唔記得$30/35/40): 一碟有10隻, 好好食亦唔會太油膩, 但兩個人食就係嫌多左d.
煲仔粥($20~30不等): 真係一定要試, 粥底好綿亦真係有海鮮味, 煲底上, 使過海鮮粥, 龍蝦粥, 潮式蠔仔粥, 蟹粥都好好味.

其實佢仲有好多款式, 不過魚唔係my favourite而普通小菜我就覺得唔使o係度食~ 同埋試過d西蘭花鮮魷之類又係炒得有少少過籠就令我覺得佢d小炒應該唔係太好. 但overall粥同海鮮真係好好.

p.s. 突然打咁大篇食評係因為一個人o係外國讀書好掛住hk的海鮮... 遲d返黎hk要影相post上黎俾大家睇~ =)