荔香園冰室 (Closed)

如果時光可以倒流，你最想返去幾時？有人話過80年代嘅香港係最美好嘅時光！著喇叭褲、飲「荷蘭水」、聽收音機錄低張國榮、梅艷芳同譚詠麟嘅歌。其實80年代，當我仲係小朋友，公公、婆婆最鍾意帶我去冬菇亭，除咗食嘢，最記得係掛起一個又一個嘅雀籠。呢間位於旺角嘅荔香園冰室，雀籠就見唔到，但店內嘅裝橫真係充滿80年代嘅味道。上湯浸時蔬濃濃嘅雞湯上面係今日嘅時蔬：菜心苗，菜心苗鮮嫩又索晒雞湯嘅香味，叫晚餐就可以加配架喇。瑞士巨脾撈麵公雞碗可以話係大排檔嘅一大icon，呢隻巨脾夠晒大隻，配埋無得輸嘅瑞士汁，夠晒入味。麵底唔少，但唔知係未麵上碗時有太多水，所以瑞士汁較淡，麵唔夠掛汁。皇袍叉燒飯滑蛋相當唔錯，蛋香味濃又夠滑，不過，叉燒份量唔多，而且口感麻麻，好彩個豉油加返唔少分。