今日約左朋友去尖沙咀行，餐廳好近k11出口，尚算方便。未入到餐廳已經響門口聞到陣陣燒海鮮味，真令人期待~
開始點餐，真係好難揀，因為每一樣都想食，除左燒海鮮必點之外，我仲想試試魚生，點了刺身5盛
相信大家出街食都好怕海膽唔新鮮好臭，但如圖所見，海膽好新聞，好鮮甜，值得一試。吞拿魚都好肥美，水準不錯。
另外還點了焱丸號壽司，大家睇圖一定好奇怪壽司什麼無飯? 因為魚生太多，飯都被遮住lol
海膽，蟹肉帶子。。。都係我好中意嘅，我諗之所以叫焱丸號係因為乘船出海搵靚海鮮
當然少不了今次主角燒海鮮，味噌甲羅，黑松露甲羅燒
所有海鮮都有員工幫忙響你旁邊表演燒，所以唔需要擔心，慢慢等食。
撈完之後，蟹肉連蟹膏一啖一啖咁食，好好味啊！
我地仲叫左鮑魚同埋帶子
鮑魚好新鮮，燒果陣仲會郁，唯有好好品嚐以示尊重。鮑魚好鮮甜，連殼燒d汁都留響入面，帶子同樣，食果陣可以拎起殼飲埋汁，好好味啊
飲杯! 食燒海鮮當然要飲下酒下火。好記得之前響日本見好多西裝友一班人食焱丸，一邊飲酒傾計一邊食到好夜，好享受放工嘅聚會，真係期待如果無疫情可以搵下同事黎一齊食
