椰小盅係主打燉湯，用椰子做燉盅，而且用純椰子水作為原湯水，聽到都覺得好味。餐牌有八款燉湯，另外可以加錢揀飯餐，亦有多款小食可供選擇。由於我唔太肚餓所以就只叫咗一個燉湯加$9飯餐。
燉湯揀咗織金竹笙烏雞椰小盅，一打開個椰盅就好香椰子味，本身以為用椰子水做湯水飲落會太甜，但其實唔會太甜，係清甜味
唔好睇個椰子好細，入面都好多湯料，烏雞同竹笙都有幾件，好足料。平時食椰皇燉蛋白或者飲椰青都一定會用匙羹刮埋啲椰子肉食，但燉湯要用老椰子，所以啲肉係硬到食唔到。
加$9加配嘅椰小飯係雜穀飯，米飯煙韌有咬口食落唔會硬。配菜菜脯好好味送飯一流。雞翼好入味肉好腍，如果可以散嗌雞翼就好喇。
價錢雖然有少少貴，但食物質素高，燉湯用料靚又足料，值呢個價錢
