鼎記 (Closed)

去旺角行街，去到旺角豉油街就決定食呢間茶餐廳。呢間茶餐廳都幾多嘢食🧐，除咗有平時見開嘅小炒，燒味，仲有雞煲同烤魚添。我同朋友都好耐冇見茶餐廳啲小炒小菜，所以就嗌咗呢兩款菜🥰。鼎記鎮江骨 $68一嚟自己好耐冇食鎮江骨，二嚟見佢又係餐廳推介，就決定食佢啦😆 鎮江骨份量多，有七、八舊，都幾多肉。鎮江骨每舊都沾滿醬汁，酸酸甜甜，濃厚度適中，特別開胃，啱晒依家夏天食。鎮江骨炸過，仲食到香脆表面，更加香口，可以見到餐廳係即叫即煮，幾好☺️ 呢個餸啱晒撈白飯食，我自己都食晒成碗添🤪大澳土魷蒸肉餅 $68呢個土魷肉餅幾有驚喜，因為平時都會覺得茶餐廳啲肉餅都係比較肥膩，多肥肉同鬆散。但呢個土魷肉餅就肥瘦均勻🤓，比一般餐廳瘦，肉餅相對有咬口，唔係一pat嘢。最好就係上面嘅土魷，土魷粒好濃味，帶到土魷本身嘅鮮味，又唔會好硬🦑。唯肉餅本身都有啲豉油，撈理土魷就會有少少鹹。是日靚菜本身以為都係一般嘅蠔油生菜，原來佢係配豆豉鯪魚汁調味嘅菜心😚，好夠味。例湯當日嘅例湯係西洋菜煲豬，好甜又多料，可以潤吓。唔會好鹹，飲完唔會口乾，仲有啲南北杏同豬肉料添😝。凍檸茶 +$9