今次喺銅鑼灣覓食，R竟然發掘到一間好多人排隊幫襯既小店《班蘭葉印尼餐廳》。
餐廳人氣極旺盛，平日晚大概7點全店坐滿，好彩唔洗等好耐就入到座。
打開餐牌，印尼美食琳瑯滿目，選擇非常之多，有齊海鮮、肉類、串燒、炒菜等不同種類，亦令我哋掙扎一輪先揀齊美食。😜
醬燒牛丸 ($58)
牛丸爆汁， 牛味香濃。😋 沙嗲汁有薑味，味道層次豐富，唔會覺得好膩。
虎蝦沙嗲 ($88)
原隻虎蝦淋上帶少少辣味嘅秘製醬汁，獨特調味襯托虎蝦本身嘅鮮甜，無得頂！😋 先食一啖原汁原味，再蘸沙嗲汁食一啖，口味各有千秋，啱晒各人口味。😛
原條魚花膠湯粉皮 ($108)
無味精全天然熬製嘅湯頭，配上一大件花膠、杞子、蟲草花，飲落口滋潤清甜，喉嚨好舒服，啱哂各位養生貪靚既朋友！😛 印尼粉皮薄而軟滑，好易入口。
原條魚煎到脆卜卜😙，配合質感結實而味道咸鮮魚肉，好滋味！☺️
印尼特色炒飯 ($88)
今餐驚喜之作！💗 未食過《班蘭葉》嘅炒飯，係唔會知道印尼式嘅炒飯係咩味/有幾好味！
《班蘭葉》呢味炒飯夠乾身、夠WOK氣、飯粒飽滿，配上胡椒、辣椒等調味，令人一啖接一啖食唔停口！
珍多冰 ($28)
愛好椰子嘅我哋，抵受唔住珍多冰嘅誘惑。🤪《班蘭葉》杯珍多冰呈上枱時層次分明，有齊珍多嘅綠、椰汁嘅白同椰糖嘅啡，好養眼。😍 撈勻一啜，香甜唔在講，最欣賞珍多食落新鮮，唔會冰鎮到硬掘掘，細節裏盡顯高質。👑🥰
《班蘭葉印尼餐廳》特色印尼菜咁正，抵佢平日晚都爆場滿座。😉 門外亦有售賣有咸有甜嘅新鮮印尼傳統小食，可惜當晚食太飽，下次有機會一定要買啲返去食。😝
📌 班蘭葉印尼餐廳
📍 銅鑼灣糖街1-5號銅鑼灣商業大廈地下B2舖
