午餐到呢間富有特色的南洋餐廳，淨係經過見到個門口都想探頭入去八卦一下，更何況美食雲集，今次要食呢度好出名嘅肉骨茶同砂煲老鼠粉。
砂煲老鼠粉
佢有砂鍋煲或者一碗上，但同朋友覺得砂鍋煲用火一邊熱住唔使凍哂，又有隻流心蛋黃開心好多，就要一大煲。
你睇下，原來「老鼠粉」其實係銀針粉，將隻流心蛋攪拌同老鼠粉仲有其它蔥粒、辣椒粒配料搞埋一齊，原來裡邊有好多一條條嘅銀魚仔同埋肉碎粒，食落去慢慢會食到一種銀魚仔嘅鹹香味，仲有辣味會慢慢滲透出來，加上佢地嘅調味料，其實都幾惹味，而且銀針粉幾乾身爽彈，唔經唔覺食下食下就係咁番咗2碗。
肉骨茶(三層肉)
最主要嘅目的，就係想試佢嘅肉骨茶
其實佢原本都有好多唔同材料嘅肉骨茶可以選擇，有雞腳,有一字骨，唔食肉食素嘅都有
佢哋嘅肉骨茶主要喺藥材湯底，賣飛佛
湯色及味道比較濃厚，絕對係覺得落足料煲嘅，飲落口會覺得比聞起上嚟嘅藥材味冇咁重，容易入口多啲。呢度嘅重點，好似話你飲完嘅肉骨茶都可以無限添飲，不過我已經一個人飲左兩碗啊，要留番個肚飲咖啡同食咖央多士
1
咖央多士
望到都知道佢脆卜卜，多士緊係要烘到少少燶先好食丫嘛，係咪咁話先？
佢裡邊嘅咖央醬，厚到好似放左塊牛油落去咁
唔會太甜，而且有好香嘅椰香味。佢哩個甜味配埋佢杯茶啡滲或者咖啡簡直一流。
茶啡滲喺香港嘅奶茶溝咖啡
南洋嘅咖啡同拉茶溝出來嘅鴛鴦，確實係同香港茶記嗰啲好唔同味道，味道真係比較傾向茶香甘香啲嘅，仲有南洋嘅咖啡係比較濃厚，所以整體黎講苦澀味會比香港茶記嘅突出少少，但又唔會好苦。
我個朋友話佢鍾意杯咖啡多啲，我有飲過一啖，真係比較濃厚甘香架喎，真係配咖央多士一流。
