南北小廚

Open Now

Now Closed

南北小廚(西貢)位於科技大學校園內，為學生同教職員提供一個好好既聚腳點。食物價錢亦都算合理，即使叫滿成枱點心，跟據人數除返開最多只係每人50蚊，相對外面的茶樓算係物超所值。平日大家可能會顧慮鮮蝦腸粉比較貴，但係係南北小廚就唔洗擔心太多，價錢相當合理。雖然價錢相對平，質素一樣唔差，大大粒蝦一樣好足料，皮既厚道適中，味道不錯。去飲茶又點可以唔食盅飯？鳳爪排骨飯真係相當唔錯，份量足夠兩個人分，排骨鋪滿成個面，睇見都流曬口水。叉燒包奶皇包當然亦都係必叫之選，兩款包既麵包厚度適中口感鬆軟，內餡一樣落足樣，咬落去啖啖叉燒啖啖奶皇，中意食中式包點既朋友一定要試下。糯米雞都係一大推介，南北糯米雞既制法同外面唔同，糯米既比例無咁高，食落無咁濟，配上秘制醬料簡直係完美配合。跟住就係蟹籽燒賣皇，論價錢，同鮮蝦腸一樣平過外面，但係呢到既燒賣就略嫌細粒，不過味道都係唔錯，原粒鮮蝦同樣可見。最後又點少得南北著名甜品咖啡糕，一層一層咁樣望落去都覺得好吸引，食落咖啡味同鮮奶層完美混合，不愧為南北一大賣點！總括而言，環境優美地方唔算細，啱曬學生同教職員來飲茶。食物質素高，價錢超值，未來想飲茶一定要試下！