馬辣台式鴛鴦火鍋 (創興廣場)

馬辣午市$158 食3個鐘，呢啲叫做識做生意。當樓上樓下都多數限時兩粒鐘，有啲仲衰到俾得70分鐘，多一個鐘頭絕對可以左右到你嘅決定。我都好怕趕喉趕命，兩粒鐘勉強夠，如果有朋友一齊又傾又食就好mun水。


1:15 行入餐廳，目測大概十枱客。睇個 setting 就有啲似樓上15樓嘅牛牛，兩間同樣都係標榜台式火鍋，同樣有兩排大雪櫃，唔難想像雙方都以對方為假想敵。

正面呢排雪櫃放瓜菜、菌類、同埋肉類為主

後面呢排就主要放丸類、腸仔餐肉、豆腐製品、同立立雜雜其他嘢

我揀咗個蕃茄洋蔥湯底，雖然餐牌上寫西紅柿，但我由細到大都只會叫佢做蕃茄。

佢部分食物要網上落單：牛梅花、安格斯、牛五花、五花腩、黑毛豬、羊肉、蝦、脆鯇魚腩、脆鯇片、蜆、雞子。同牛牛比較，同樣三牛二豬一羊，牛牛就少咗魚腩但多咗魚頭同青口。所有嘢都新鮮，都唔係求其俾啲渣嘢。


啲肉每人每次出三四片，其他嘢多數兩片，都係控制損耗嘅做法，唔夠再叫，好過嘥嘢。罐裝包裝飲品之外佢有豆漿同椰青水，甜品櫃就就只係得啲啫喱椰汁糕之類簡單嘢，冇牛牛咁多蛋糕仔又有雪糕櫃。


既然佢同牛牛兩間好似孖生姊妹咁，不如就兩間比較吓：馬辣貴$10但多一粒鐘，嘢食大致上一樣，不過牛牛就有咖啡機沙冰機，多啲嘢飲，租品又多啲花款。


總結：如果想平十蚊或者重視甜品就牛牛，如果想慢慢嘆就馬辣，兩間各有千秋，好難講邊間好啲，不如就打和啦 super！