牛太 (Closed)

趁個囡未升小學，仲可以平日陪我吃喝玩樂，午餐都想同佢食好啲嘆下，今次我帶佢去荃新天地既牛太食燒肉，佢哋既午市定食只係$79起，都幾抵食。午市定食有5款可選，分別在於不同既肉類，另包一罐汽水。而白飯、泡菜、昆布湯則可無限添加。我地點左B餐「牛肋肉+豚腩 」和D餐「牛肋肉+豚腩+雞腿肉」。每份肉既份量都唔少，而且基本醃過，所以唔洗點燒肉醬都夠入味。牛肋肉薄切，輕輕燒一燒已經可以食，牛味香濃，油花均勻，口感好好。而豚腩都值得推介，燒到脆卜卜，加埋泡菜係絕配。雞腿肉嫩滑。二人份量其實都夠食啦，但見到追加有牛仔骨同原條牛肋肉，又好似唔錯，所以每款追加一份。牛仔骨一客三件，厚薄適中，食落仲好稔滑無渣，啖啖肉好好味。牛肋肉就要花啲耐性燒，因為都幾厚肉，肉質稔軟，味道都唔錯。餐廳座位之間空間寬濶，私密度高，食完燒肉都無全身一陣燒烤味認真難得。店員都好有禮貌，仲不時問我哋洗唔洗加飯和湯，態度相當殷勤👍