8
午市餐目有十款，價錢由$95至$138不等，另加一。收費算好經濟喎。一人叫左一個餐，另外再加散叫。
万両定食 $118 另加一
万両定食有十件壽司。下面左起分別有：
京蔥沙律炙燒甜蝦：鮮甜爽口炙燒蝦刺身加埋好多脆口京蔥再配埋少少沙律醬，夠特別，味道好又有多重口感炙燒三文魚魚籽蟹柳水菜卷兩件：炙燒三文魚魚生片上面加左少少三文魚籽，下面係包住一少件蟹柳同新鮮水菜，食落爽脆中帶點魚籽鹹香甜蝦蟹膏青瓜片軍艦：蟹膏好鮮又滑溜
京蔥吞拿魚腩軍艦上面左起係赤身，油甘魚，三文魚，薑蓉墨魚，同鰻魚。鰻魚凍左冇咁好食，其他就正常啦，飯量適中，唔多唔少，魚生size都正常，呢個價錢唔算貴。
跟餐沙律係新鮮沙律菜加車厘茄同粟米粒，再加少少胡麻醬。
跟餐麵豉湯除左豆腐粒同海帶，仲有少見嘅菇仔。味道濃淡適中，唔會太鹹。熱辣辣上枱，冬天飲最啱。
鰻重定食 $138 另加一
鰻重用個日式有蓋飯盒放好。鰻魚超大條，抵食喎。鰻魚肉質肥美，有好多肉食，熱辣辣，鰻魚汁夠多，只係略嫌唔夠彈牙。原來飯量唔係好多，唔怕太飽。除左跟餐沙律同麵豉湯，伴飯仲有蘿蔔同櫻花漬物，同埋凍豆，後者有d奇怪。
另外叫左職人壽司，今日好多款壽司都冇貨。
3
炙燒地金目鯛 $42一貫 另加一
餐牌寫明日本產，賣相不俗，灑上菊花瓣。每貫壽司有兩片魚生，頗薄身，味道可以，有魚鮮味。
炙燒真鱈白子 $38一貫 另加一
真鱈白子即係鱈魚精囊，份量幾多，質感好滑溜同厚身，有少少暖，食落似肝臟，上面加左少少蔥花同酸甜啫喱調味。味道方面，個人唔係太鍾意。試過就算。
一如既往，主餐牌有好多野食揀，有刺身，多款壽司，軍艦，卷物，手卷，拼盤，前菜，一品料理，燒物，炸物，煮物，汁物，串燒，同甜品。
2
帶子冰菜沙律伴黑松露汁 $78 另加一
上次食過呢個沙律唔錯，今次要encore。帶子四片，薄切不過都鮮甜，上面放好唔少蟹籽。個黑松露汁簡直係畫龍點睛，帶子配黑松露汁好好味。沙律菜主要係冰菜同生菜，我平時好少食冰菜，好新鮮又脆，另外仲有車厘茄，味道唔錯，不過下底太多黑松露汁。
軟殼蟹生春卷伴日向夏沙律汁 $88 另加一
呢個軟殼蟹生春卷伴日向夏沙律汁我想試好耐。軟殼蟹生春卷一客6件，薄薄卷皮包住好脆口嘅炸軟殼蟹，生菜片，青瓜絲同少少牛油果，上面加左三文魚籽。伴碟有日向夏沙律汁，味道甜甜酸酸而有粒粒脆脆果粒咬吓。食落又薄又脆又新鮮，有多重口感。
鵝肝壽司
鵝肝煎得脆皮，而入面就滑溜，上面加左少少黑醋同蔥花，味道口感都唔錯。
串燒牛舌 $32 另加一
串燒牛舌一客3片，都幾厚身，食落都彈牙，係鹹左少少。伴碟有一塊檸檬。
燒羊架配柚子胡椒 $68 另加一
呢度既羊架唔係好大件，雖然燒到熟哂，不過都算嫩口，香草都重手。餐牌寫明係紐西蘭。伴碟有柚子胡椒同檸檬一片。
雙色雪糕糯米卷伴日本產士多啤梨 $45 另加一
呢款雙色雪糕糯米卷伴日本產士多啤梨係期間限定！雙色雪糕係士多啤梨同雲呢拿味，我嚴重懷疑係哈根大師出品，好食呀！雙色雪糕用好薄同煙韌嘅糯米卷包住，連層皮都好食過人。伴碟有一粒日本士多啤梨切半，都唔細粒又算甜，食得出係日本貨色。呢個甜品抵食。
食完大大滿足，果然食物質素有保證，午餐特別抵食。食咁多野都係一個鐘頭搞掂，上菜時間合理。疫情期間平日午市期間都有好多位剩，下次又可以再黎。
