潮鮮薈自助燒烤專門店 (Closed)

初初以為呢家新開張，啲食評又好似幾好咁，所以就諗住去試試。但嘢食有啲失望，款式少就不在話，嘢食大多都好鹹。其次，如果有四個人或以上一枱，佢每人會送一set海鮮拼盤。但佢話冇貨嘅原因，結果有近一半都冇提供，包括廣島蠔、黑毛豬腩、牛肉丸、大啡菇等。另外，佢聲稱甜品會有雪糕泡芙、雪米糍同是日精選，結果淨係得泡芙提供，因為佢仲話其他冇貨。仲有佢話like咗佢facebook page，再逼你俾個五粒星，就可以每人送一杯Häagen-Dazs雪糕，但like完佢先話冇貨，無奈到爆。再者，佢有啲賤嘅一樣嘢係，差唔到夠鐘就熄咗少少燈同wifi，同埋收起一部份飲品。唔明點解佢要咁做。但都有嘢讚嘅，地方係幾闊落，職員態度都未算太差嘅。仲有，佢夠鐘都唔會趕人走，雖然佢會熄燈熄wifi收埋啲飲品。如果想體驗下自助串燒，都可以試。但我唔會再推介人嚟。