首先有芝麻鹽醬椰菜做前菜，比平時普通嘅芝麻醬食落更有層次。
然後點左份壽司8盛，分別有海膽，三文魚子，香蔥吞拿魚茸，甜蝦，黑松露帶子，白身魚，鯛魚，三文魚。每件壽司都脹卜卜，好足料。
然後我哋要再一份浜燒龍蝦盛合。
1
包括有波士頓龍蝦，北寄貝，貴妃貝，鮑魚，黃貝。
龍蝦有個大鉗，而蝦身開邊後輕輕一撬就成條龍蝦肉出左黎，勁彈牙，而且好多膏，十分鮮甜。
鮑魚食落有口感但完全唔哽好爽口。
而幾種貝類大細唔同，但同樣只係簡單灒上清酒，就帶出個種鮮甜味道。
作為海鮮控既我淨係食呢度又點夠啊！所以我哋散叫咗個味噌蟹甲羅燒配脆多士。
啖啖口感豐富鮮甜既蟹膏根本唔需要加太多配料，只係加鵪鶉蛋，小小蔥花同埋麵包糠，已經係人間美味。
食海鮮又點少得魚，另外仲要咗個金鯛魚柳西京燒。
燒好後的魚表面金黃香脆，魚肉帶有淡淡白味噌的甘甜味。
差啲唔記得咗講星期一至四只要讚好仲有韓國原版海膽送！
雖然係送嘅但係質素一啲都唔差，海膽非常鮮甜，一啲腥味都冇，每啖都好滿足。
最後仲有柚子雪芭做甜品。呢個可以話係我食過最好味嘅柚子甜品。將雪芭放喺柚子殼入面，柚子嗰份清新味道非常強，酸酸甜甜將之前既飽膩感完全消除，十分滿意！
