今晚又係同奶奶二人世界，所以都叫唔到太多嘢食。
見到隔離枱個白雲鳯爪幾靚，我地都叫咗個食，要另加10元。份量係一人一隻，鳯爪夠晒入味，辣味唔太搶，唔錯唔錯！
小籠包係我响上海菜入面至愛的item。話說當年只得幾歲的我已經可以一個人鯨吞一籠十隻的小籠包，所以每次試新的上海餐廳，我必叫小籠包(除非得自己一個食啦)！佢地嘅小籠包皮厚薄剛剛好，夾起唔易穿，湯汁帶少少甜，唔係一味得個鹹字，係比較出色的一道菜。
上海排骨湯麵，湯麵條條分明沒有糊在一起，湯不太鹹，好食！但排骨(即豬排)比較油和肥。
呢個京城炸醬麵係唔辣嘅，好似中式肉醬意粉咁，不過我地放咗一陣至食，所以撈嗰時黏埋一舊，不過因為個肉醬做得好味，所以唔太影響我對佢嘅印象。下次上菜後即時撈應該會好啲。食完呢個比較滯，所以唔好獨食，同人地分享嚟食會好啲。
因為餐廳繁忙所以一早叫咗呢個甜品，所以又係嚟唔切上菜後即時食嘅菜式，食嗰時外皮已經淋咗少許。佢與別不同嘅係佢個餡(即係豆沙同香蕉蓉)唔多，所以冇其他餐廳嘅高力豆沙咁甜。對我地嚟講係好事，但係可能其他顧客就會覺得料太少喇。
响餐具選擇方面，呢間餐廳都有細心位，就係個筷子頭係防滑嘅，咁就唔怕夾雞絲粉皮嗰時要一條條咁夾啦~！
注意：每位茶芥5元，設有加一服務費。(所以杯茶唔好用嚟洗筷子咁浪費呀！)
