六合小巷 (Closed)

今日午餐去左開張冇耐嘅六合小巷食午餐，店員話依家午餐會配埋前菜同飲品。前菜今日係花生，會不時有轉換。我就叫左精裝牛三寶麵粗麵(少麵)，牛三寶係牛腩，牛筋同牛肚。不得不讚，三寶炆得超入味，牛腩帶少少筋，適量肥肉，咬落唔會覺得乾。牛筋幾乎入口即溶，雖然入味，但唔會覺得太鹹，牛肚有咬口，但唔會太韌。酸菜爽脆，好夾。而且一飲湯底就分得出湯底與別不同，第一啖飲落唔會覺得特別濃，但係之後會有少少甘香嘅藥材香味，唔會覺得係苦澀，而係鹹香中帶有少少甘香。粗幼麵揀左粗麵，麵身扁，闊身，食落有咬口，滑身而且吸到湯味。絕對係出色嘅台灣麵小食叫左個蚵仔煎，份量都幾大煎得香脆，粉唔會過多，蚵仔味道香濃滑溜。跟餐飲品加配珍珠奶茶少冰加桂花凍，加左桂花凍隱約覺得多左份清新香味，味道都唔錯。餐廳喺裝修，佈置花左唔小心思，環境舒服，午飯時間都不停有客人。去開北角附近可以一試~