平日唔算太多人，座位寬敞。後面嗰啲雪櫃就係放任食 時段嘅飲品，飲品種類繁多。呢度不失為同朋友促膝長談有地方。
先嚟咗刺身拼盤，包括有三文魚，希靈魚，八爪魚，北寄貝，帶子同埋甜蝦。全部都好新鮮，絕對唔比日式放題遜色。我最鍾意食個甜蝦同埋帶子，好鮮味好甜。
跟住就輪到個雞煲，雞煲分為大辣，中辣同小辣。我哋唔係好食得辣，所以揀左小辣。雞煲既麻辣汁，好惹味，食到舐舐脷唔停得口。雞肉結實，雞皮又嫩滑啖啖肉好滿足。
海鮮拼盤絕對唔野少，有帆立貝，鮮蝦，生蠔同埋鮮魚片。帆立貝大大隻絕無欺場，鮮蝦新鮮。生蠔雖然細粒咗少少但鮮味出眾。鮮魚片啖啖肉，唔腥得嚟又滑，口感軟淋。
安格斯牛肩胛，美國自然豬，墨魚丸 ，牛丸，菜肉餃， 同埋鯪魚滑。 啲牛肉同埋啲豬肉，紋理非常漂亮，脂肪比例均勻，食落好軟腍，一啲都唔韌，好好食。
其實食完上面嗰啲主菜我哋已經八成飽。跟住先開始任食放題， 30款任食配料，例如有午餐肉，豬頸肉，豆腐，丸類應有盡有而且質素都唔差，抵食夾大件。
當然唔少得我哋最愛食嘅魚皮同埋響鈴喇 ! 卜卜脆好好味。
食依餐真係值回票價，埋單都係大概三百蚊一個人，真係去邊度搵?下次一定要喺宵夜時段嚟,拎埋嗰個8折先。
