先從環境講起，CoffeeCon位於山腰，景色其實不錯，餐廳內部比較擠擁，整體比較焗，排隊處旁邊就有餐牌，方便顧客提早諗定食咩，而外面露天用餐區則空氣流通不少，而且空間也比較大，較推薦。
到服務質素，其實係令人失望，我去嘅時候係中午時段，人流比較多，排隊都差唔多排到去大膳堂，不過無傷大雅，排左好耐，期間我已經諗定食咩，結果到俾錢嘅時候，先被告知冇哂湯麵，我嚟CoffeeCon就係為咗食何粉，排咁耐隊先知冇，如果冇唔係應該要貼喺餐牌咩，真係失望。令我更嬲嘅係，個職員一講完冇湯麵就直接嗌「下位」，直接當我冇到，堅嬲。我好肚餓，唔想再排過，所以叫咗個豬柳漢堡意粉，但係咁嘅服務質素我真係接受唔到。
最後到食物質素，容我直接，垃圾。
其實湯麵真係唔錯，甚至可以話喺呢個價錢($25-40)係算好食，但呢個茄汁意粉，真係狗也不__。一眼望落去，全部係醬，我知落大量醬係香港意粉特色，但今次真係太多，喺意粉份量細嘅情況下(係，真係好少，我最後食哂都係唔飽)，蕃茄醬可以話係多過啲意粉，條條意粉都掛住成啖醬，食落口就好似飲咗啖濃稠嘅醬，真係好噁心。
個醬仲要唔係鮮甜嘅蕃茄汁，而係最最最劣質、成陣膠味嘅下欄嘢，成啖食落口簡直就係味覺嘅衝擊，對我精神意志嘅考驗，喺我口腔入面發生嘅恐怖襲擊。大家應該多少想像到，CoffeeCon嘅茄汁意粉到係幾恐怖，奉勸大家珍惜生命遠離茄汁意粉，除非玩真心話大冒險嘅時候叫人哋食呢個意粉，如果唔係真係唔好再叫，唔好再助長歪風。
