想點就點 (Closed)

因為早前喺上環德輔道中嘅「想點就點」食過他們嘅粥底火鍋，當時又見到隔離檯食緊他們自家製嘅點心覺得都特色同吸引，所以我們今日特意去食吓！我們問店員有邊款係最多人客點同最受歡迎，店員就同我們推介咗呢幾款，手作鮮蝦餃嘅餃皮好煙煙韌韌，蝦肉相當爽甜彈牙，而且好大隻！黃金脆蝦角嘅賣相同平日食開嘅唔同，外層好似魚網咁，包著爽甜嘅蝦肉，而且炸得超級金黃香脆同完全無油膩嘅感覺！原隻鮮蝦腸唔係配豉油，而係用奶白色嘅魚湯浸著，魚湯嘅味道好鮮味，腸粉嘅質感好煙韌軟滑！手剁鮮牛肉球嘅牛肉係採用新鮮嘅牛肉手剁，所以食落有好香濃嘅牛肉鮮味！娘惹糯米糕嘅質感非常煙煙韌韌，再配埋舖面嘅椰絲同花生碎一齊食，令到口感更加豐富，而且味道唔會過甜！奶皇流心西多士係用兩塊軟熟嘅方包夾著香甜嘅奶黃流心，再沾滿蛋漿之後攞去炸，色澤炸得相當金黃，切開一啲入面嘅奶黃流沙流晒出嚟，流沙嘅效果做得非常好，真係超正呀！係本人嘅必食推介！