Spasso Italian Bar & Restaurant

朋友生日，一大班人喺尖沙咀搵食。尖東梳士巴利道海旁附近其實有唔少特色餐廳，而且唔少都係西餐廳或者係酒吧，迎合外國人口味。今日我哋試呢間餐廳係意大利餐廳，星期日有semi buffet brunch。
前菜嘅沙律菜同海鮮可以喺出面嘅buffet bar入面任食。先講一講海鮮，選擇都算唔少，有生蠔、青口、熟蝦、龍蝦、海螺等等，生蠔幾細隻，冇乜肉地，青口亦都有少少沙，反而係開邊龍蝦幾好味，肉質鮮甜，亦都幾爽口，淨係食兩件都已經抵返曬。

Seafood Buffet

龍蝦

中間嘅buffet bar就擺咗好多唔同類型嘅沙律菜，有燒茄子、燒黃瓜、大蘑菇、火箭菜、羅馬生菜、水牛芝士、蕃茄、parma ham、哈密瓜，總之你諗得到嘅沙律菜都一應俱全 。如果唔係要留肚食主菜，我諗淨係食沙律吧啲菜都已經食飽。

1

Salad Bar

buffet bar另一個角落亦都有all day breakfast，不過就唔係咁好食感覺上好似早餐食淨咁，例如薯餅就淋晒凍冰冰，炒蛋亦都打到碎曬，可以放棄。

真係好一般

輪到主菜喇。主菜有五個選擇，而我揀咗三文魚扒，味道一般，食落有少少鹹，反而係墊底嘅小椰菜索咗三文魚嘅肉汁，甜甜地又幾好味。

Grilled Salmon

食到最後，侍應奉上一個甜品拼盤，一個蒸籠入面放咗雲呢拿同開心果雪糕、tiramisu、 cheesecake、蘋果酥同埋少量生果，雪糕同cheesecake都唔錯，其餘試過就算啦。

Dessert Platter

正如我前文所講，呢一帶有好多呢類型嘅西餐，講質素呢間亦唔算係好標青，但呢個buffet bar嘅陣容黎講都算係抵食嘅！