Smokey Ice (Closed)

Happy Friday 約埋班friends去旺角食嘢，行過比Smokey Ice門口啲裝飾燈吸引住，於是就決定入去試下。入到去侍應好有禮貌打招呼，可以自由揀坐卡位定窗邊位。7成熟牛扒雪糕認真好有驚喜，上餐嘅時候會有啲乾冰效果嘅煙係碟底。將朱古力味雪糕整到一舊和牛咁，牛扒雪糕入面仲夾左士多啤梨味雪糕，模仿7成熟牛扒嘅顏色，側邊加埋朱古力饀嘅多士，滿足曬視覺味覺享受。Oreo 窩夫盛好有心思咁將啲oreo碎夾係窩夫入面，外脆內軟，加埋雪糕一齊食，簡直係無得彈！小食推介一定要試黑松露芝士薯條，薯條炸到金黃香脆，新鮮熱辣，黑松露芝士醬未食已經聞到好香。另外，水牛城雞翼都係值得一試，少少辣好野味。飲品試左藍天之雲，睇得出好有心思，好好飲！每杯飲品都會有一個會著燈嘅杯墊墊住，好夢幻，飲都飲得開心啲。