早前有幸成功預約到大班樓九如坊舊店, 當時已經十分驚艷想再訪, 搬鋪後第二次開放網上預約終於成功
菜單形式轉咗做套餐形式, 用餐前幾日會收到email, 可以揀3道頭盤、3道主菜 (1海鮮2肉類)、1蔬菜、1飯/麵, 可以另外加錢追加菜式, 不過套餐份量已經好夠食
1
金錢蟹盒 - 打響頭炮係金錢蟹盒, 非常香脆, 但蔥同其他餡料味道蓋過咗蟹味, 蟹肉味道同口感都唔突出, 有少許失望
一口湯 - 是日靚湯係粉葛鯪魚湯, 清甜可口, 以為食哂3道頭盤先有湯, 但上菜次序按口味由淡至濃, 變咗先飲湯🤣
1
山楂梅子脆皮豬尾 - 第一次食豬尾, 感覺有D似豬手, 但豬尾更精緻炸到好香口, 香脂感唔高但仲有好重骨膠原, 山楂梅子醬酸酸甜甜更昇華
1
剁椒鹹肉蒸龍躉魚頭 - 食過一次蒸花蟹配陳村粉, 所以轉試試蒸龍躉魚頭, 同樣出色, 魚肉爽彈嫩滑, 加埋魚頭位較多骨膠原, 調味剛好, 食到剁椒嘅香辣又唔會過火, 鹹肉更帶出魚鮮甜
十八味豉油雞 - 人多可以全隻雞上, 而且會連埋內臟, 同行朋友見到非常開心, 大部分雞件都已經去骨, 食得暢快, 雞皮唔厚, 雞肉滑溜入味, 講唔出邊18味, 但就係好味
1
羊腩片叉燒 - 唔膻但偏油膩, 雖然燒到焦香, 但唔係太同叉燒掛勾到, 未去到難食但有D四不像
樟木煙燻黑腳鵝 - 是晚MVP, 上菜已經有煙燻鵝味飛撲埋嚟, 影完相就會幫忙切件, 鵝皮燻到乾爽薄脆, 鵝肉軟腍入味外汁, 鵝皮鵝肉之間油脂恰好, 非常出色, 最後食唔哂打包第2日翻熱都仍然好味
1
XO醬炒時菜 - 冇吝惜XO醬, 而且佢地嘅XO醬比坊間更濃郁蝦味, 菜心有再刨走外層, 淨低最鮮嫩部份, 唔太食菜嘅朋友都讚
梅乾菜扣肉煲仔飯 - 份量十足, 上菜前會撈好再分碗, 煲仔飯最緊要就係金黃飯焦, 店員會分上, 梅乾菜有處理過冇過鹹, 扣肉入口即溶, 飯粒油潤香口, 平日唔食飯同澱粉質嘅一眾都即時放棄, 食咗先講, 可想而知呢個煲仔飯有幾出色
甜品三味 - 生磨杏仁茶、桂花糕、奶黃煎堆仔
見到唔少店員係九如坊舊店過嚟, 依舊有禮sharp醒, 高質菜式更多咗創新玩味, 想再食呢間The World's 50 Best Restaurant要再努力網上搶位🥺
