1
我哋坐低後，侍應隨即送上一盤魚生刺身，當中有三文魚、油甘魚、吞拿魚、帶子、甜蝦同八爪魚，仲有成板海膽㖭，刺身新鮮，肉質爽口，真係好正！
跟住海鮮拼盤送上，嘩！除咗有鮑魚、大蝦、生蠔、螺之外，竟然日本三大名魚喜知次都有，我都係第一次用喜知次嚟燒，以前通常都係食刺身多。
嘩完我哋又再嘩！因為兩盤燒肉拼盤駕到，主菜盤當中有美國牛肋骨、澳洲牛西冷、牛胸腹、肉眼同米澤三元豚西冷，而另一盤則有雞翼、骨付雞肉腸同七味豚拖羅(豬頸肉)。
我哋將貝殼類海鮮放喺爐邊燒，中間就燒肉類，咁樣就可以一邊燒肉一邊等海鮮熟，慳啲時間食多啲囉。
而且啲和牛真係肉嫰多汁，再點啲喜馬拉雅山玫瑰鹽嚟食，更能帶出多幾分牛肉香味，當中最好味就係和牛西冷，我哋追加咗幾碟之餘，再叫多份厚切牛舌片，牛舌口感嫩滑，食前加幾滴青檸汁，一啲肥膩感都冇，食唔停口。
另外，我哋加咗啲七味粉去燒雞翼同豬頸肉，真係超好味。而海鮮就落啲清酒一齊燒，既可提升海鮮鮮味外，啲肉都冇咁乾，好食好多哦！
一班酒鬼，不停咁飲，嚐盡各式各樣酒類飲品，有sake、梅酒、柚子酒、紅白酒、麥啤同韓啤，如果唔飲酒亦有其他飲料，最特別係有蘋果味嘅玉泉+C，仲有一系列冇防腐劑嘅韓國果汁，啲果汁有幾多果肉粒㖭，又幾好味喎！
除咗標準嘅蛋糕、撻甜品外，亦有Movenpick杯裝雪糕任食，不過榴槤雪糕一定要試，榴槤味非常濃，仲有兩隻好有趣嘅雪條：芒果益力多味同另一隻澳洲雪條，由果菜汁造成，味道清得嚟幾特別，總之就係好味啦！
最後揀款喜愛茶包，泡杯熱茶解解膩。
一班兄弟都覺得呢間餐廳服務好，食物質素高，大家決定約個時間再嚟飽餐一番！
