Ramen House Hototogisu

呢幾日天氣轉涼，個人好自然想食碗熱辣辣嘅拉麵暖下身。尋日先試完個蠔湯拉麵，點知今日行過見到呢間舖頭，門口貼滿獎狀連米芝蓮都有，心諗橫掂記憶猶新，不如即刻比較下。
點知一入門，心已經涼一截。伙計零笑容、零招呼、零介紹，成間舖好似我打擾佢哋咁。諗住有咁多獎，服務應該唔差，點知連基本禮貌都無。抱住「可能食物搭救」嘅心態叫咗碗蠔拉麵，一上枱真係得啖笑。
湯底淡茂茂，飲落同連鎖店嘅急凍湯包無分別。最離譜係面頭嗰隻熟蠔，凍冰冰兼縮晒水，口感好似食緊擦膠咁。老實講，尋日喺普通小店食嗰碗，湯濃蠔鮮，贏呢間所謂得獎名店九條街。
真係唔明點解攞到咁多獎，可能我唔好彩啦。但第一印象已經決定一切，以後行過都係直接去返連鎖店好過，至少唔會貼錢買難受。