啲夥計都幾有禮貌同熱情，係咁叫我哋試吓Pizza，我見隔離枱食都好似幾正咁，但晏啲我又同女朋友食dinner，所以我就唔係食左咁多。我同兄弟首先一人叫咗一個牛角包，價錢三十幾蚊，仲包飲品，OK啦。而家求其喺間茶記食菠蘿油都要依個價。我哋分別要咗煙三文魚餡同埋吞拿魚餡，兩者都塞到好滿，而且個牛角包本身都夠鬆軟，比起Coffee Shop嗰啲嘅出品優秀。
我地愈坐得耐，食完一樣又忍唔住嗌第樣，我哋叫咗一份日式黑豚肉漢堡，share食，$58蚊，佢無論個樣同味道都唔錯，其實佢有少少似豬扒包，但又維持到西式漢堡包嘅感覺。麵包係深黑色，估計係用咗黑炭原素，味道就同正常麵包無異。我好欣賞塊豬扒夠厚，而且亦都好Juicy。
嗌咗個黑豚肉漢堡就可以以優惠價加小食，我哋追加左份辣汁煙三文魚$28，老實講上枱時真係唔知係乜，但原來係加咗辣醬汁嘅煙三文魚。估唔到點醬食比起就咁食更加開胃，但朋友就嫌重口味，不過如果真係唔中意，撥開啲醬就OK。
最後不得不提依間冰廳竟然有生蠔食？我本身見到個餐牌，以為夜晚先有，但原來午市後就已經有供應。佢既然可以逐隻嗌，我就愛爾蘭$38同法國$20都各來一隻試下，過吓口癮。果然價錢唔同，生蠔都係有啲分別。愛爾蘭嗰隻明顯比較肥美，但兩款嘅海水味都強。
飲品來講，我哋兩個麻甩佬竟然不約而同地都係嗌花茶飲，可能受女朋友影響得多哈哈！我要左洛神花冰蜜茶，兄弟好似要咗伯爵茶。跟餐可享半價。花茶大大壺，好襟飲，我果隻茶好濃味，帶點甜，但都算清潤。最終諗諗吓，我哋坐咗都成兩個鐘，又嗌啲輕食同花茶飲，感覺真係好港女，我同返女朋友講，佢都笑我，哈哈。整體而言，呢間餐廳價格相宜，嚟食放題都冇問題，雖然係講笑，但真心抵食。
